ശിവപൂജ സംശയ നിവാരണം

സംശയ നിവാരണം

ഭാരതീയ ധർമ്മ പ്രചാര സഭയും, സത്വ ടിവിയും ചേർന്ന് സംഘടിപ്പിക്കുന്ന ശിവപൂജയിലേക്ക് എല്ലാവർക്കും സ്വാഗതം.

ഈ ജീവിതത്തിൽ നിങ്ങൾ എടുത്ത തീരുമാനങ്ങളിൽ ഏറ്റവും ഉത്തമമായ ഒന്നാണ് ശിവ ഉപാസന പഠിക്കുക എന്നതിൽ യാതൊരു സംശയവുമില്ല.

പ്രപഞ്ചത്തിലെ സമസ്ത സമൃദ്ധിയും അനുഭവിച്ച് മോക്ഷത്തെ സ്വീകരിക്കാൻ നമ്മുടെ ആചാര്യന്മാർ നമുക്ക് തന്നിട്ടുള്ള പദ്ധതികളാണ് ഉപാസന പദ്ധതികൾ.

സഗുണോപാസന / നിർഗുണോപാസന എന്നീ രണ്ട് തരത്തിലാണ്  ഉപാസന നിലനിൽക്കുന്നത് ഇതിൽ സഗുണോപാസനയിൽ ഏറ്റവും പ്രധാനപ്പെട്ട ഒരു സമ്പ്രദായമാണ് ശൈവ ഉപാസന.

ഉപാസന പഠിക്കാൻ സാധിക്കുക എന്നത് ഭൂമിയിൽ തിരഞ്ഞെടുക്കപ്പെട്ട വർക്ക് മാത്രം ലഭിക്കുന്ന ഒരു മഹാഭാഗ്യമാണ്.  എല്ലാവരെയും വളരെ സ്നേഹത്തോടെ  ശൈവ ഉപാസന പദ്ധതിയിലേക്ക് സ്വാഗതം ചെയ്യുന്നു.

ഏവരുടെയും മനസ്സിൽ ഉണ്ടായേക്കാവുന്ന ചില ചോദ്യങ്ങളും അതിൻറെ ഉത്തരങ്ങളും ആണ് താഴെ

1. പ്രശ്നം :
ആർക്കൊക്കെ ശിവപൂജ ചെയ്യാം

സമാധാനം
പ്രായ ലിംഗ  വർണ്ണ ഭേദമില്ലാതെ ഏതൊരാൾക്കും ശിവപൂജ യിലൂടെ പ്രപഞ്ചത്തിലെ സമസ്ത ഐശ്വര്യങ്ങളും തൻറെ ജീവിതത്തിലേക്ക് കൊണ്ടുവരാൻ സാധിക്കും.

2. പ്രശ്നം :
പൂജ ചെയ്യാൻ സംസ്കൃതം പഠിക്കേണ്ടതുണ്ടോ ?

സമാധാനം
ഒരിക്കലുമില്ല ചില മന്ത്രങ്ങൾ  സംസ്കൃതത്തിൽ ആണെങ്കിൽ പോലും അതിൻറെ അർത്ഥം വളരെ സരളമായ രീതിയിൽ ഇവിടെ വിവരിക്കുന്നുണ്ട്.

3. പ്രശ്നം :
പൂജകൾ ഒക്കെ ഒരു ഗുരുനാഥനെ കീഴിൽ നിന്നും ഉപദേശമായി സ്വീകരിക്കേണ്ടത് അല്ലേ യൂട്യൂബിൽ നിന്ന് പഠിക്കുന്നത് ശരിയാണോ ?

സമാധാനം
ഉപദേശം സ്വീകരിക്കേണ്ട മന്ത്രങ്ങളും അല്ലാതെയുള്ള മന്ത്രങ്ങളുണ്ട്.  ബീജാക്ഷര മന്ത്രങ്ങൾ മാത്രമാണ് ഗുരുനാഥനിൽനിന്നും  നേരിട്ട് സ്വീകരിക്കേണ്ടത്.  ബീജാക്ഷരം, മന്ത്രങ്ങൾ, വേദമന്ത്രങ്ങൾ,
ഉപനിഷത്ത് മന്ത്രങ്ങൾ, സ്തുതികൾ, നാമങ്ങൾ, സ്തോത്രങ്ങൾ, തുടങ്ങി അനവധി തരത്തിലുള്ള മന്ത്രങ്ങളുണ്ട്.

ബീജാക്ഷരം മന്ത്രങ്ങളും വേദമന്ത്രങ്ങളും ഗുരുനാഥനിൽ നിന്നും നേരിട്ട് സ്വീകരിച്ചു ഉപാസിക്കേണ്ടതാണ്.

ഇവിടെ ഷോഡശ ഉപചാര പൂജയും ചില പ്രത്യേക സൂക്തങ്ങളും സ്തുതികളും സ്തോത്രങ്ങളും ഉപയോഗിച്ചുള്ള  പൂജയാണ് ചെയ്യുന്നത്.

4. പ്രശ്നം :
പൂജക്ക് ഒരുപാട് മുദ്രകളും ആവാഹനാദികളോടെ ഒക്കെ ഇല്ലേ, അതൊക്കെ നമുക്ക് യൂട്യൂബിൽ പഠിക്കുവാൻ സാധിക്കുമോ?

സമാധാനം
തീർച്ചയായും സാധിക്കും വളരെ ലളിതമായ രീതിയിൽ ഷോഡശ ഉപചാര പ്രകാരത്തിലുള്ള പൂജയാണ് ഇവിടെ പരിചയപ്പെടുത്തുന്നത്.  ഇതിൽ കൂടുതൽ മുദ്രകൾ, കഠിനമായ ക്രമങ്ങൾ ഒന്നുംതന്നെയില്ല ഏതൊരു സാധാരണക്കാരനും വളരെ എളുപ്പത്തിൽ ലളിതമായി ചെയ്യാവുന്ന രീതിയിലാണ് ശിവ പൂജ ചിട്ടപ്പെടുത്തിയിട്ടുള്ളത്.

5. പ്രശ്നം :
പൂജ ചെയ്തു തുടങ്ങിയാൽ പിന്നീട് മുടങ്ങിപ്പോയാൽ എന്തെങ്കിലും ദോഷം ഉണ്ടാകുമോ ?

സമാധാനം
ഒരിക്കലുമില്ല
ചെയ്താൽ  ധാരാളം ഗുണമുണ്ട് തുടങ്ങിയിട്ട് ചെയ്തിട്ടില്ലെങ്കിൽ യാതൊരു തരത്തിലുള്ള ദോഷവും സംഭവിക്കുന്നതല്ല.

6. പ്രശ്നം :
സ്ത്രീകൾക്ക് ഉപാസന ചെയ്യാമോ ?

സമാധാനം

തീർച്ചയായും സ്ത്രീകൾക്ക്   ചെയ്യാം

7. പ്രശ്നം :
പൂജ ചെയ്യാൻ പ്രത്യേക പൂജാമുറി ആവശ്യമുണ്ടോ ?

സമാധാനം
ഒരിക്കലുമില്ല വീട്ടിലെ എല്ലാവരും ഒന്നിച്ചിരുന്ന് ചെയ്യുന്നതാണ് ഏറ്റവും വിശേഷം.  ഡൈനിങ് ഹോളിലോ മുറിയിലോ  എവിടെ വച്ച് വേണമെങ്കിലും ചെയ്യാം നല്ല വൃത്തി ഉണ്ടായിരിക്കണം എന്ന് മാത്രം.

8. പ്രശ്നം :
പൂജ  പഠിച്ചാലുള്ള ഗുണങ്ങൾ എന്തൊക്കെയാണ്?

സമാധാനം
മഹാദേവൻ  സമൃദ്ധിയുടെ ദേവനാണ്,വിശ്വാസത്തോടെ ഉപാസിച്ചാൽ  നമ്മുടെ എല്ലാ തരത്തിലുള്ള കഷ്ടതകളിൽ നിന്നും കടങ്ങളിൽ നിന്നും നമ്മെ രക്ഷിച്ചു, ധനത്തെയും ധാന്യങ്ങളുടെയും രത്നങ്ങളുടെയും സമ്പത്തിന്റെയും സമൃദ്ധി ഉണ്ടാവും

9. പ്രശ്നം :
ഏതൊക്കെ ദിവസങ്ങളിലാണ് ഉപാസന ചെയ്യേണ്ടത് ?

സമാധാനം
മാനസപൂജ യായും വസ്തുക്കൾ ഉപയോഗിച്ചും പൂജ ചെയ്യാം.  മാനസികമായും ചെയ്യുന്നതിന് വസ്തുക്കൾ ഒന്നും തന്നെ ആവശ്യമില്ല എല്ലാം മനസ്സിൽ സങ്കല്പമായാണ് ചെയ്യുന്നത്.

എന്നാൽ വസ്തുക്കൾ ഉപയോഗിച്ചുള്ള പൂജ, ആഴ്ചയിൽ ഒരു ദിവസമോ എല്ലാ തിങ്കളാഴ്ചകളിലാ വിശേഷ അവസരങ്ങളിലോ താല്പര്യം തോന്നുകയാണെങ്കിൽ ദിവസേനയോ നിങ്ങളുടെ സൗകര്യമനുസരിച്ച് ചെയ്യാം യാതൊരു നിയമങ്ങളും നോക്കേണ്ടതില്ല.

10. പ്രശ്നം :
ഒരു പൂജ ചെയ്യാൻ എത്ര സമയമെടുക്കും ?

സമാധാനം
സാധാരണയായി പഠിച്ചു കഴിഞ്ഞാൽ എല്ലാ ദ്രവ്യങ്ങളും ഉപയോഗിച്ച് ചെയ്യുകയാണെങ്കിൽ 40 മിനിറ്റ് മുതൽ ഒരു മണിക്കൂറിനുള്ളിൽ ഒരു പൂജ പുർണ്ണമാക്കാം എന്നാൽ മാനസികമായ ഉപാസനയാണ് ചെയ്യുന്നതെങ്കിൽ 10 മുതൽ 20 മിനിറ്റിനുള്ളിൽ പൂർണമാവുന്നത് ആണ്.

ഉപാസനയ്ക്ക് പുറമേ കൂടുതൽ സൂക്തങ്ങളും നാമജപങ്ങൾ ഭജനകൾ എന്നിവ ഉൾപെടുത്തിയാൽ അതിനനുസരിച്ച് കൂടുതൽ സമയമെടുക്കും.

11. പ്രശ്നം :
എത്ര ദിവസം കൊണ്ട് നമുക്ക് ശിവ പുജ പരിശീലിക്കാം ?

സമാധാനം
1ദിവസം കൊണ്ട് പൂർണമായും പഠിച്ചു കഴിയുന്ന രീതിയിലാണ് പാഠഭാഗങ്ങൾ തയ്യാറാക്കിയിരിക്കുന്നത്  
യൂട്യൂബ് വീഡിയോയുടെ സഹായത്താൽ
നിങ്ങൾക്ക് സ്വന്തമായി  പൂജ ചെയ്യാൻ സാധിക്കുന്നതാണ്

12. പ്രശ്നം :
പൂജ പഠിച്ചാൽ നമുക്ക് ക്ഷേത്രങ്ങളിൽ പൂജ ചെയ്യാൻ സാധിക്കുമോ ?

സമാധാനം
ഇത് ഒരു ഉപാസന പദ്ധതി മാത്രമാണ്.  നിങ്ങൾക്ക് മഹാദേവനെ ഉപാസിച്ച്  ജീവിതത്തിലെ എല്ലാ ദുരിതങ്ങളിൽ നിന്നും മാറി ഐശ്വര്യങ്ങൾ വരാൻ വേണ്ടിയുള്ള ഒരു പദ്ധതിയാണ്

ഷോഡശ ഉപചാര പദ്ധതി അനുസരിച്ചാണ് ഇവിടെ പൂജ പഠിക്കുന്നത് ലളിതമായതും ലഘുവായതും ആയ പദ്ധതിയാണ് ഒരിക്കലും ഈ പദ്ധതികൊണ്ട് നിങ്ങൾക്ക് ക്ഷേത്രത്തിലോ മറ്റ് സങ്കേതങ്ങളിലെ പൂജ ചെയ്യാൻ സാധിക്കുകയില്ല.

13. പ്രശ്നം :
മത്സ്യമാംസാദികൾ കഴിക്കുന്നവർക്ക്  പുജ ചെയ്യാൻ സാധിക്കുമോ ?

സമാധാനം
ഇത് ഒരു പുജ പദ്ധതിയാണ് ഏതൊരാൾക്കും പുജ ചെയ്യാം പൂജ ചെയ്യാൻ സസ്യാഹാരി ആവണം എന്ന് യാതൊരു നിർബന്ധവുമില്ല.

14. പ്രശ്നം :
ആരാണ് ആണ് പുജകൾ തയ്യാറാക്കിയത്?

സമാധാനം
ഭാരതീയ ധർമ്മ പ്രചാര സഭയുടെ പ്രധാന ആചാര്യനായ ഡോക്ടർ ശ്രീനാഥ് കാരയാട്ട് ആണ് പൂജാ ക്രമത്തിന് നേതൃത്വം നൽകുന്നത് താന്ത്രിക വിഷയത്തിൽ വളരെ ആഴത്തിലുള്ള അറിവും ഉപാസന പാരമ്പര്യമുള്ള മഹത് വ്യക്തിയാണ് അദ്ദേഹം.

15. പ്രശ്നം :
പൂജക്ക് ശിവലിംഗം വീട്ടിൽ പ്രതിഷ്ഠിക്കേണ്ട ഉണ്ടോ ?

സമാധാനം
പൂജ ചെയ്യുന്നത് ശിവലിംഗത്തിൽ ആണ്
പൂജ കഴിഞ്ഞാൽ ശിവലിംഗം പ്രതിഷ്ഠിക്കേണ്ട   ആവശ്യമില്ല
പ്രാണ പ്രതിഷ്ഠ നടത്തുന്ന രീതിയിലല്ല ഇവിടെ പുജ ചെയ്യുന്നത്

16. പ്രശ്നം :
പൂജ ചെയ്യുന്നതിന് വീട്ടിൽ ശുദ്ധം പാലിക്കേണ്ടതല്ലേ?

സമാധാനം
നമ്മൾ നമ്മുടെ ഈശ്വരനെയാണ് ഉപാസിക്കുന്നത് അതിന് കൂടുതൽ നിയമങ്ങൾ നോക്കേണ്ടതില്ല ഈശ്വരൻ ശിക്ഷിക്കുന്ന കലയല്ല   അനുഗ്രഹിക്കുന്ന കലയാണ്.

17. പ്രശ്നം :
പൂജക്ക്  ദക്ഷിണ വേണ്ടതല്ലേ?

സമാധാനം
എല്ലാവരെയും സാധകർ ആക്കുക എന്ന ഉദ്ദേശത്തിലാണ് പൂജ അപ്‌ലോഡ് ചെയ്യുന്നത് ദക്ഷിണ സമർപ്പിക്കണമെന്ന് നിർബന്ധമുള്ളവർക്ക് ഇഷ്ടമുള്ള സംഖ്യ സമർപ്പിക്കാവുന്നതാണ്

ഭാരതത്തിൽ ഏതൊരു വിദ്യയും സ്വീകരിക്കുമ്പോൾ ദക്ഷിണ കൊടുക്കുന്ന സമ്പ്രദായമുണ്ട്.  മാത്രവുമല്ല ഒരു ദക്ഷിണ നൽകി ഒരു വിദ്യ സ്വീകരിക്കുമ്പോൾ മാത്രമാണ് നമുക്ക് വിഷയത്തോട് കൂടുതൽ ഫലം ഉണ്ടാവുന്നത്.

18 .പ്രശ്നം :

നമ്മൾ എത്ര മണിക്കാണ് പൂജ ചെയ്യുന്നത് ?

സമാധാനം

എല്ലാവരുംഒരുമിച്ച് പൂജ ചെയ്യുമ്പോൾ ഒരു പ്രത്യേക ഊർജ്ജം ഉണ്ടാവും എന്നുള്ളതിനാൽ ആണ് നമ്മൾ പൊതുവായ ഒരു സമയം നിശ്ചയിച്ചിട്ടുള്ളത്.  അത് ശിരാത്രി ദിവസം ( 11/03/21) വൈകീട്ട് രാവിലെ  7.00 മണി മുതൽ 8.00 മണി വരെയുള്ള സമയമാണ്. (ഇന്ത്യൻ സമയം ആണ് ഇവിടെ പറഞ്ഞിട്ടുള്ളത്).  എല്ലാവരുംതന്നെ IST സമയവുമായി ബന്ധപ്പെടുത്തി അതാത് രാജ്യങ്ങളിലെ സമയം വ്യവസ്ഥ ചെയ്ത് പൂജ ചെയ്യേണ്ടതാണ്.

ഇനി അതിനു സാധിച്ചില്ലെങ്കിൽ നിങ്ങളുടെ സൗകര്യം ഉള്ള സമയത്ത് നിങ്ങൾക്ക് പൂജ ചെയ്യാം.  പൂജ ചെയ്യുക എന്നുള്ളതാണ് ഏറ്റവും പ്രധാനപ്പെട്ട കാര്യം.

19. പ്രശ്നം

ഏതു ദിക്കിലേക്ക് തിരിഞ്ഞാണ് പൂജ ചെയ്യേണ്ടത് ?

സമാധാനം

പൂജ ചെയ്യുന്നതിന് ദിക്ക് പ്രധാനപ്പെട്ട ഒരു വിഷയമല്ല.  നിങ്ങളുടെ സൗകര്യം ആണ് പ്രധാനം.  കിഴക്കോട്ടോ പടിഞ്ഞാറോട്ടോ തിരിഞ്ഞിരിക്കുക എന്നത് ഉത്തമം ആയി കണക്കാക്കുന്നു.

20. പ്രശ്നം

പൂജക്ക് എത്ര വിളക്കുകളാണ് ഉപയോഗിക്കേണ്ടത് ?

സമാധാനം

പൂജക്ക് ഒരു വിളക്ക് മതി.  പിന്നെ രണ്ടു വിളക്കോ അതിലധികമോ വെച്ച് പരമാവധി നിങ്ങൾക്ക് അലങ്കരിച്ച് ഭംഗിയാക്കാവുന്നതാണ്. 

ഒരു വിളക്കാണ് വെക്കുന്നതെങ്കിൽ  ശിവലിംഗത്തിന് തൊട്ടുപുറകിൽ വയ്ക്കാവുന്നതാണ്.  രണ്ട് വിളക്ക്  ഉണ്ടെങ്കിൽ.  ഇരുഭാഗത്തും വെക്കുക. 

21.പ്രശ്നം

 പൂജയ്ക്ക് വീട്ടിലുള്ള മറ്റുള്ളവരെ പങ്കെടുപ്പിക്കാൻ പറ്റുമോ ?

സമാധാനം

തീർച്ചയായും പറ്റും എല്ലാവരെയും പങ്കെടുപ്പിക്കുകയാണ് വേണ്ടത്.

22. പ്രശ്നം

എല്ലാവരും പൂജ ചെയ്യേണ്ടതുണ്ടോ  ?

സമാധാനം

ഒരാൾ പൂജ ചെയ്യുകയും മറ്റുള്ളവർ എല്ലാവരുംതന്നെ പൂജാ കർമങ്ങളിൽ പങ്കെടുക്കുകയും ചെയ്യുന്നതാണ് ഉത്തമം.

23.പ്രശ്നം

 നോട്ട് നോക്കി ചെയ്യാൻ പാടുള്ളതാണോ ?

സമാധാനം

നിങ്ങൾക്ക് പുസ്തകം നോക്കിയോ ഓഡിയോ കേട്ടോ പൂജ ചെയ്യാവുന്നതാണ്.

24.പ്രശ്നം

 പൂജ ക്ലാസിലെ പാഠങ്ങൾ വ്യക്തമായി പഠിക്കാൻ സാധിച്ചിട്ടില്ല അപ്പോൾ എങ്ങനെയാണ് പൂജ ചെയ്യുക. ?

സമാധാനം

പൂജയുടെ mp3 ഓൺ ചെയ്തു അതിലെ നിർദ്ദേശങ്ങൾക്കനുസരിച്ച് പൂജ ചെയ്താൽ മതിയാകും.  എവിടെയെങ്കിലും നമുക്ക് കൂടുതൽ സമയം വേണമെന്ന് തോന്നുകയാണെങ്കിൽ അവിടെ ഓഡിയോ പോസ് ചെയ്തു അത് നിങ്ങളുടെ സൗകര്യം അനുസരിച്ച് പൂജ മുന്നോട്ടു പോകാവുന്നതാണ്.

25.പ്രശ്നം

 സാധനങ്ങൾ മുഴുവൻ കിട്ടിയിട്ടില്ലെങ്കിൽ എങ്ങനെ പൂജ ചെയ്യും ?

സമാധാനം

നമുക്ക് പൂജ മൂന്ന് രീതിയിൽ ചെയ്യാവുന്നതാണ്.
1. മാനസികമായി ചെയ്യുന്ന പൂജ : പൂജയുടെ ഓഡിയോ കേട്ടു കൊണ്ട് കണ്ണുകൾ അടച്ചു വെച്ച് പൂജ ചെയ്യുന്നതായി ഭാവന ചെയ്യുന്നതാണ് മാനസികമായി ചെയ്യുന്ന പൂജ.

2. വാചികം : സാധനങ്ങൾ ഒന്നും ഇല്ലെങ്കിലും ഒരു വിളക്ക് കത്തിച്ചു വെച്ച തന്ത്രങ്ങളെല്ലാം ഉച്ചരിച്ച ചർച്ച ചെയ്യുന്നതാണ് വാചിക പൂജ.

3. വസ്തുക്കൾ ഉപയോഗിച്ചുള്ള പൂജ : എല്ലാ വസ്തുക്കളും ഒരുക്കിവെച്ച ചെയ്യുന്നതാണിത്.  ഏതെങ്കിലും വസ്തുക്കൾ ലഭിച്ചിട്ടില്ലെങ്കിൽ പകരം അക്ഷതമോ ജലമോ പുഷ്പമോ ഉപയോഗിച്ചാൽ മതിയാകും.
ജലവും പുഷ്പവും മാത്രം ഉപയോഗിച്ചും പൂജ ചെയ്യാം.

വസ്ത്രത്തിനും ഉത്തരീയത്തിനും  പകരമായി പുഷ്പമോ അക്ഷതമോ സമർപ്പിക്കാം.

തേനിനും  പാലിനും പകരം ജലം തന്നെ ഉപയോഗിക്കാം.

26.പ്രശ്നം

 പൂജ ചെയ്യാനുള്ള പാത്രങ്ങൾ ലഭിച്ചിട്ടില്ലെങ്കിൽ എങ്ങനെ പൂജ ചെയ്യും?

സമാധാനം

നമുക്ക് വീട്ടിലെ അടുക്കളയിലുള്ള ഗ്ലാസ്സോ സ്പൂണോ പാത്രമോ കിണ്ടിയോ ഉപയോഗിച്ച് പൂജ ചെയ്യാവുന്നതാണ്.

27. പ്രശ്നം

ശിവലിംഗം  ഇല്ലെങ്കിൽ എന്ത് ചെയ്യണം ?

സമാധാനം

ഒരു താലത്തിൽ അരി വിരിച്ച്
നാളികേരം വെച്ച് ശിവലിംഗമാണെന്ന് ഭാവന ചെയ്ത് നമുക്ക് പൂജ ചെയ്യാം

28.പ്രശ്നം

 പൂജയ്ക്ക് ഉപയോഗിക്കുന്ന വസ്ത്രങ്ങൾ വീണ്ടും ഉപയോഗിക്കാൻ കഴിയുമോ ?

സമാധാനം

തീർച്ചയായും നമ്മൾ നിരന്തരം പൂജ ചെയ്യാൻ തീരുമാനിക്കുകയാണ്, അതുകൊണ്ടുതന്നെ പൂജയ്ക്ക് ഉപയോഗിക്കുന്ന വസ്തുക്കൾ കഴുകി ശുദ്ധിയാക്കി വീണ്ടും ഉപയോഗിക്കാവുന്നതാണ്.

29 . പ്രശ്നം

അമ്പലത്തിൽ നിന്നും ലഭിച്ച പട്ട്  ചന്ദനം എന്നിവ പൂജയ്ക്ക് ഉപയോഗിക്കാമോ ?

സമാധാനം

അമ്പലത്തിൽ നിന്നും പ്രസാദമായി ലഭിച്ച സിന്ദൂരം കുങ്കുമം പൂജയ്ക്ക് ഉപയോഗിക്കരുത്. കാരണം അത് പ്രസാദമാണ്, നിർമാല്യമാണ്.

എന്നാൽ ക്ഷേത്രത്തിൽ നിന്നും ലഭിച്ച പട്ട് കഴുകി ശുദ്ധിയാക്കി ഉപയോഗിക്കാം.

30. പ്രശ്നം

വസ്ത്രം ലഭിച്ചിട്ടില്ലെങ്കിൽ എന്തു ചെയ്യും ?

സമാധാനം

വസ്ത്രത്തിന് പകരം പുഷ്പമോ അക്ഷതമോ സമർപ്പിക്കാം.

31.പ്രശ്നം

 ഒരു പ്രാവശ്യം പൂജക്ക് ഉപയോഗിച്ച പുഷ്പങ്ങൾ പിന്നീട് ഉപയോഗിക്കാൻ കഴിയുമോ ?

സമാധാനം

ഇല്ല,  ഒരു പ്രാവശ്യം ഉപയോഗിച്ച പുഷ്പങ്ങൾ പിന്നീട് ഉപയോഗിക്കാൻ പാടുള്ളതല്ല.

32. പ്രശ്നം

പുഷ്പാഞ്ജലി ചെയ്യുമ്പോൾ നമ്മുടെ വീട്ടിലെ എല്ലാവരുടെയും പേരിൽ പുഷ്പാഞ്ജലി ചെയ്യാമോ ?

സമാധാനം

തീർച്ചയായും, എല്ലാവരുടെയും പേരിൽ പുഷ്പാഞ്ജലി ചെയ്യണം. നിങ്ങൾ Audio / mp3 കേട്ടുകൊണ്ടാണ് പൂജ ചെയ്യുന്നതെങ്കിൽ mp3 അവിടെ Pause ചെയ്തു എല്ലാവരുടെയും പേരിൽ പുഷ്പാഞ്ജലി ചെയ്തതിനുശേഷം ബാക്കി പൂജ തുടരാവുന്നതാണ്.

33.പ്രശ്നം

 നിവേദ്യത്തിന് എന്തൊക്കെ സാധനങ്ങൾ ആണ് ഉപയോഗിക്കേണ്ടത് ?

സമാധാനം

നിങ്ങളുടെ കഴിവ് പോലെ പഴമോ നാളികേമോ ത്രിമധുരമോ പായസമോ  ഉപയോഗിക്കാം.

34. പ്രശ്നം

ഏത് / എന്ത് പായസമാണ് ഉപയോഗിക്കേണ്ടത് ?

സമാധാനം

ശർക്കര പായസമോ പാൽപ്പായസമോ നിങ്ങൾക്ക് ഏറ്റവും നന്നായി ഉണ്ടാക്കാൻ അറിയുന്ന ഏത് പായസവും നിവേദ്യമായി ഉപയോഗിക്കാം.

ഫലങ്ങൾ മാത്രം വെച്ചും നിവേദ്യം ചെയ്യാവുന്നതാണ്.

35. പ്രശ്നം

സ്ത്രീകൾക്ക് പൂജ ചെയ്യാൻ 

സാധിക്കുമോ ?

സമാധാനം

തീർച്ചയായും സ്ത്രീകൾക്ക് പൂജ ചെയ്യാം. സ്ത്രീകൾ പൂജ ചെയ്യുന്നത് വളരെ വിശേഷമാണ്.

36. പ്രശ്നം

സ്ത്രീകൾക്ക് ആർത്തവ സമയത്ത് പൂജ ചെയ്യാമോ ?

സമാധാനം

പൂജ തികച്ചും വ്യക്തിപരമായ ഒരു ഉപാസന പദ്ധതിയാണ്. അതുകൊണ്ടുതന്നെ പൂജ ചെയ്യുന്നതിൽ നിന്നും ആരെയും മാറ്റി നിർത്തിയിട്ടില്ല.

37.പ്രശ്നം

 പുലവാലായ്മ ഉള്ളപ്പോൾ പൂജ ചെയ്യാമോ ?

സമാധാനം

നമ്മുടെ വീട്ടിൽ ആരെങ്കിലും മരിച്ചിട്ടുണ്ടെങ്കിൽ മാത്രം പൂജ ചെയ്യുന്നതിൽ നിന്നും മാറി നിൽക്കാം.
മറ്റെല്ലാവർക്കും തന്നെ പൂജ ചെയ്യാവുന്നതാണ്

38. പ്രശ്നം

വിളക്കിൽ എത്ര തിരിയാണ് ഇടേണ്ടത് ?

സമാധാനം

വിളക്കിൽ രണ്ട്തിരിയോ, അഞ്ചുതിരിയോ വിളക്കിൻറെ വലിപ്പമനുസരിച്ച് ചെയ്യാം.

39. പ്രശ്നം

നിലത്ത് ഇരുന്ന് പൂജ ചെയ്യണം എന്ന് നിർബന്ധം ഉണ്ടോ ?

സമാധാനം

ഒരു നിർബന്ധവുമില്ല.  നിങ്ങൾക്ക് കസേരയിൽ ഇരുന്ന് മേശ, ടീ പോയ് യുടെ മുകളിൽ ചെയ്യാവുന്നതാണ്.

40. പ്രശ്നം

മന്ത്രങ്ങളിൽ തെറ്റു വന്നാൽ എന്തെങ്കിലും ദോഷമുണ്ടോ ?

സമാധാനം

ഒരു ദോഷവുമില്ല, ദേവത ശിക്ഷിക്കുന്ന ശക്തിയല്ല രക്ഷിക്കുന്ന ശക്തിയാണ്.

41.പ്രശ്നം

 ശിവരാത്രി പൂജ കഴിഞ്ഞാൽ പിന്നെ എപ്പോഴാണ് പൂജ ചെയ്യേണ്ടത് ?

സമാധാനം

നിങ്ങളുടെ സൗകര്യം അനുസരിച്ച് ആഴ്ചയിൽ ഒരു ദിവസമോ മാസത്തിൽ ഒരു ദിവസമോ അല്ലെങ്കിൽ വിശേഷ അവസരങ്ങളിലോ സൗകര്യം  പോലെ ചെയ്യാവുന്നതാണ്.

42. പ്രശ്നം

പൂജ തുടങ്ങി പിന്നീട് എപ്പോഴെങ്കിലും പൂജ മുടങ്ങി പോയാൽ ദോഷമുണ്ടോ ?

സമാധാനം

ദേവതയുടെ ഗുണം ശിക്ഷിക്കലല്ല രക്ഷിക്കൽ ആണ്, ഒരിക്കലും ദോഷം ഉണ്ടാവുകയില്ല.

43.പ്രശ്നം

 പൂജക്ക് ശേഷം എത്ര സമയം കഴിഞ്ഞ് പൂജാ വസ്തുക്കൾ മാറ്റം ?

സമാധാനം

പൂജ കഴിഞ്ഞ് ഒരു മണിക്കൂർ സമയം കഴിഞ്ഞ് എപ്പോൾ വേണമെങ്കിലും മാറ്റാവുന്നതാണ്.

44.പ്രശ്നം

 പൂജയുടെ പ്രസാദം അടുത്ത വീടുകളിലെല്ലാം നൽകാമോ ?

സമാധാനം

തീർച്ചയായും, പൂജയുടെ പ്രസാദം ചുറ്റുപാടുള്ള എല്ലാ വീടുകളിലും നൽകാവുന്ന നതാണ്.  അടുത്തുള്ള വീട്ടിലെ ആളുകളെ പൂജയ്ക്ക് പങ്കെടുപ്പിക്കാം.

45.പ്രശ്നം

പൂജ ചെയ്യാൻ പറ്റിയ സമയം ഏതാണ്?

സമാധാനം

നിങ്ങൾക്ക് എപ്പോഴാണ് ചെയ്യാൻ സാധിക്കുന്നത് ആ സമയത്ത് ചെയ്യാവുന്നതാണ്.

46. പ്രശ്നം

എങ്ങനെയാണ് പഞ്ചാമൃതം ഉണ്ടാക്കുന്നത് ?

സമാധാനം

കൽക്കണ്ടം മുന്തിരി തേൻ പഴം നെയ്യ് എന്നിവ ഉപയോഗിച്ച് പഞ്ചാമൃതം ഉണ്ടാക്കാം.

47. പ്രശ്നം

മണി കിട്ടിയില്ലെങ്കിൽ എങ്ങനെ പൂജ ചെയ്യും ?

സമാധാനം

മണി വളരെ നിർബന്ധമുള്ള ഒരു കാര്യമല്ല.

48. പ്രശ്നം

പൂജയ്ക്ക് എന്തൊക്കെ പുഷ്പങ്ങൾ എടുക്കാം ?

സമാധാനം

നിങ്ങളുടെ വീട്ടുമുറ്റത്തുള്ള ഏതു പുഷ്പവും പൂജയ്ക്ക് ഉപയോഗിക്കാം.  തുളസിയും കൂവളവും എല്ലാം തന്നെ ഉപയോഗിക്കാം.

49. പ്രശ്നം

പുഷ്പം തീരെ കിട്ടിയില്ലെങ്കിൽ എന്തു ചെയ്യും ?

സമാധാനം

പുഷ്പം കിട്ടിയിട്ടില്ലെങ്കിൽ അക്ഷതം ഉപയോഗിക്കാവുന്നതാണ്. 

50. പ്രശ്നം

പൂജ ചെയ്യുമ്പോൾ പുതിയ വസ്ത്രം ധരിക്കേണ്ടതുണ്ടോ ?

സമാധാനം

ഒരിക്കലുമില്ല, വളരെ ശുദ്ധമായ ഒരു വസ്ത്രം ധരിക്കണം എന്ന് മാത്രം.

51.പ്രശ്നം

 വെറ്റില കിട്ടിയില്ലെങ്കിൽ പകരം എന്ത് ചെയ്യും ?

സമാധാനം

വെറ്റിലയ്ക്ക് പകരം പുഷ്പാക്ഷതങ്ങൾ സമർപ്പിക്കാവുന്നതാണ്.

52. പ്രശ്നം

 പീഠം എന്ന് പറയുന്നത് എന്താണ് ?  വീട്ടിൽ പീഠം ഇല്ലെങ്കിൽ എന്ത് ചെയ്യും?

സമാധാനം

മരത്തിൻറെ പീഠം തന്നെ വേണമെന്നില്ല, പ്ലാസ്റ്റിക് ഉപയോഗിക്കാം.  നമ്മൾ ഇരിക്കാൻ ഉപയോഗിക്കുന്ന പലക കഴുകി ശുദ്ധിയാക്കി ഉപയോഗിക്കാം.

53. പ്രശ്നം

വസ്ത്രത്തിനു പകരം എന്താണ് ഉപയോഗിക്കുക ?

സമാധാനം

വസ്ത്രത്തിനും ഉത്തരീയത്തിനും യജ്ഞോപവീതത്തിനും നൂല് ഉപയോഗിക്കാവുന്നതാണ്.

54. പ്രശ്നം

നമ്മൾ  ദിവസവും പൂജ ചെയ്യേണ്ടതില്ലേ  ?

സമാധാനം

പൂജ ചെയ്യുന്ന കര്യത്തിൽ നിങ്ങൾക്ക് 100 % സ്വാതന്ത്ര്യമുണ്ട്
നിങ്ങളുടെ സമയവും താൽപര്യമനുസരിച്ച് ചെയ്യുന്നതാണ്

55.പ്രശ്നം

വസ്ത്രം വീണ്ടും ഉപയോഗിക്കാമോ ?

തീർച്ചയായും ഉപയോഗിക്കാം